لماذا لغيت مقالتي الخاصة بتأييد ( عبود الزمر ) كرئيس للجمهورية

لماذا لغيت مقالتي الخاصة بتأييد ( عبود الزمر ) كرئيس للجمهورية


1-
صحيح أن الكثير من العقول المتفتحة فهموا ما كتبته و لماذا كتبته... الا أن بعض العقول التي لا أفهم تركيبتها مثل شخصية محترمة تدعي ( جومانا كريم ) لا أعرف من هي و لكن ما أعرفه عنها أنها من النوع الذي يكتب ( Medecine ( و ليس ( Medicine )و أنا تعاملت مع مثل هذا النوع كثيرا من قبل..واتهمتني بالعديد من الاتهامات الغريبة مثل الاهانة و الاساءة و أنني عميل أمريكي و كانت علي وشك اتهامي بأنني من سرقت خزانة عم دهب ...مع أنني وحياة أمي لم أقصد اهانة الا لفكر متحجر دموي...و لست عميل أمريكي و لا علاقة شخصية لي مع باراك أوباما...كما أنني لم اسرق خزانة عم دهب و عندي الدليل و السي دي اللي يثبت ان اللي سرقه عصابة القناع...


2-
لأنني قررت أن اتفاءل بعض الشئ و أقول لنفسي ان الاسلاميين مش هيمسكوا الحكم في مصر قبل 5 سنين..فأنا قدامي 5 سنين مش هفكر في الموضوع ده


3-
لأن أمي شعرت بالخوف الشديد و استحلفتني أن الغي هذا المقال حتي لا يستبيحوا دمائي و دماء اللي جابوني...مع اني قلتلها اننا في عصر الحرية و الديموقراطية لكنها لم تستمع لي مش عارف ليه !!


4-
لأني قلت أنه يرتدي نظارة و هي اختراع غربي لعين و لكن مصدر موثوق أكد ان النظارة اللي لابسها صيني


5-
لأني قلت ان عشان ( كاسترو ) بذقن الشعب هينتخبه لو رشح نفسه...لكن الكثير من الشعب الحويط أكدوا لي انهم مش هينتخبوه الا لو مسكو ذقنه بنفسهم و اتأكدوا انها حقيقية


6-
لأنه شكر ثورة 25 يناير لأنهم السبب في خروجه من السجن...و أنا قد قررت أن احاول النظر بشكل جديد للثورة...زمان كنت أنظر لوجهها أجد ناس مغلولة من النظام...فنظرت من الجنب فوجدت تحمس غريب في اتجاه لا يعلمونه كأن لسان حالهم يقول ( نثور بس و يبقي ربنا يسهلها ) .. فقلت أنظر من فوق فوجدت أنهم في الطريق أن يركبون من ( الاخوان ) بشكل صعب...فقررت أن انظر للثورة من ورا و خلاص

7-
لأنني نسيت حقيقة أنه لو مسك الحكم هيلغي اللون الأحمر لأنه حرام...و ده هيكون العصر الذهبي للزمالك و فرصته الوحيدة انه ياخد الدوري...و ده مش في مصلحتي عشان ( مرتضي منصور ) ماسك عليا سي دي


8-
لأن حتي لو ان ( عبود الزمر ) كان بيحاور ( مني الشاذلي ) بكل احترام... ناس من أنصاره كانوا يدعونها بالمتبرجة...و بصراحة فكرت كثيرا ان لو ( مني الشاذلي ) بملابسها المحتشمة و مكياجها البسيط متبرجة...فالراجل ده ممكن يقيم علي الحد لو شافني لابس قميص و فاتح الزرار اللي فوق..

9-
لأنني أملك الشجاعة الكافية أن أقول ( أسف ) لكل من فهم كلامي بطريقة خاطئة

10-
عشان في جزء من شعب مصر الذكي الواعي فهم من المقال اني عاوز ارشحه فعلا للرئاسة


11-
لأني في مقالي السابق كتبت :
( تعلمت منه الكثير فالانجليز اللي كانوا في مصر مكانوش مسيحيين عشان كدة مسيحيي مصر ساعتها ثاروا عليهم عادي...و ان المسيحيين اللي حاربوا في 73 حاربوا عشان كانوا بيحاربوا يهود... و اتعلمت كمان ان لسا في دول صليبية لحد دلوقتي...و لما يبقي رئيس هفضل اتعلم منه كتير زي ان الاسلاميين هما اللي وحدوا القطرين و ان ( توم ) و ( جيري ) كل اللي بيحصل بينهم ده عشان اختلافات مذهبية...)
و لكني بعدما بحثت في كتب التاريخ و بالبحث الدقيق في المواقع الموثوق بها علي الانترنت... تأكدت بالدليل القاطع أن الانجليز اللي كانوا في مصر مسيحيين


Michael Nessim

Articles Mania