خلاصة زهرة الخشخاش...عشان متتبهدلش في نيابة الدمرداش

خلاصة زهرة الخشخاش...عشان متتبهدلش في نيابة الدمرداش

1-
يجب أن تؤمن ايمانا شديدا بمقولة ( الاعمار بيد الله ) ... لأن مجهودك الشخصي مش هيفرق حاجة في القدر...

2-
الختم بتاعك هو شرفك.....ميفارقش جيبك و متسلموش لأي امتياز تحت أي ظروف...حتي ورق بنك الدم تكون خاتم شوية و مخليهم معاك...بلاش ختمك علي ورق فاضي يبقي عملة رخيصة في ايد اي ك....احم....أي حد


3-
تاني سلاح ليك بعد الختم هو التليفون...توصل بيه للامتياز و تبلغ بيه أي مصيبة للي أكبر منك عشان تطلع نفسك منها.....تدخل بيه علي النت....و أهم استخدام تتصور بيه و انت لابس البالطو أو السكرابس عشان تحط الصور علي ( الفيس بوك )...و برضه تليفونك و انت في الدمرداش ميفارقش جيبك...حتي و انت بتستحمي...

4-
بالنسبة للنواب الاناث الغير متزوجات...اتبعي المقولة اللي بتقول
( الحنية و اللين مع المدرسين...يضمنلك تطلعي تنامي في السكن.. و يجيلك بدل العريس اتنين )


5-
عند تعاملك مع الامتياز لازم تحط في دماغك الحقيقة التي تقول ( الامتياز كائن لا يعرف شئ و لا يدري لماذا و لا يري الي اين ..و لو حاولت تشرحله مش هيفهم برضه ) فبلاش أذية عشان هو مش ناقص... و كمان بلاش كل اللي يعدي عليك في الروند يسبلك ...ده بيعملك سمعة وحشة في المستشفي زي اللي عند بعض نائبات التجميل و بعض نواب الانف و الاذن و أحد نواب الهيماتولوجي ....
و كل ما تكون لطيف مع الامتياز كل ما هيسمعوا كلامك في الشغل.. مع بعض الفوائد الاضافية مثل الامتياز اللي ييجي يساعدك بعد ما الروند بتاعهم يخلص...و ان سمعتك تبقي حلوة في المستشفي زي بعض نواب الجراحة.. وكمان الامتياز اللي تجيبلك سندوتشات و بيبسي و كيك....
لكن اللي يحاول يستعبطك....يعيد الروند من غير تفكير و لا شكوي...تشطب علي غيابه في الانصراف ( الورق بيبقي معاك ) و تسلمه و تتابعه لحد ما يعيد الروند..و ربنا ميجيبش أذية


6-
عند تعاملك مع ( الستاف ) ..كلمة حاضر يا بيه متفارقكش و دايما علي لسانك...و مهما اتقالك من مغالطات علمية قول طبعا و حاضر..و ده بيفكرني باليوم اللي وافقت فيه ان الباراسيتامول بيخفض الحرارة أكتر من الكتافلام..... المهم..لا تجادل و لا تناقش يا أخ علي

و لو ( الستاف ) واحدة ست يبقي كل اللي هتعمله ...ابتسامة عريضة مع صباح الخير يا دكتورة ( متقولش لا بيه و لا هانم ) ... تبص للساعة اللي في ايديها و تسألها و انت محرج...هو الساعة دي حضرتك جايباها منين أصلي عاوز اجيب واحدة لماما..و سيبها ترغي يا معلم و انت عامل نفسك مستمتع بالرغي....و حاول تعرف ايه نوع البارفان اللي بتحطه و تقولها و انت محرج و في نفس الوقت باصص في عينيها باحراج ( هو ده بارفان كذا ...أصلي بحبه أوي من زمان ) و خلاص كدة هي مش هتقرفك تاني...



7-
عند تعاملك مع قسم الاشعة عشان تستأذنهم يعملوا اشعة لعيان...
لو انتي بنت تبقي محلولة..
و لو انت ولد يبقي ابعت واحدة امتياز يكون مشهود ليها بالكفاءة...و لو منفعتش ممكن تعمل حيلتي الخاصة اني ابعت العيان بنفسه يستأذن لنفسه...و في الغالب بيصعب عليهم و بيعملوا الاشعة ..
ولو طلعوا من كفار قريش و مرضيوش... و واحد أكبر منك سألك فين الاشعة...قوله الجهاز بايظ...و اساسا كدة كدة الاجهزة في الدمرداش أحيانا بتشتغل علي غير العادة....و كدة كدة محدش هيسأل وراك

8-
خلي قلبك علي المريض.....لو مصلحته يروح مستشفي تاني أحسن...متبخلش عليه يا أخي بالنصيحة و الاقناع...



9-
التمريض هو أهم فئة في المستشفي.... متطلبش منهم فوق الطبيعي و افتكر ان عندك امتياز ممكن يسحب عينات و يعلق دم و محاليل...خليهم وقت الزنقة...و احترمهم هيحترموك...الكلام ده في كل المستشفيات ماعدا مستشفي النسا...بلاش الجزء الاخير بتاع الاحترام ده و هم هيحترموك أوي...


10-
تحذير هام...
لو هتبقي نائب في قسم التجميل...بعض النائبات اللي عاملين بنات دول مش بنات في الأصل...و النصيحة المخلصة : متقعدش معاهم في الليالي المقمرة و تخليك شايل ثوم معاك دايما...

11-
مريض الدمرداش غلبان أوي...علاجك ليه كمان يقع تحت بند العطاء.....لأنك اللي بتاخده ميعتبرش مرتب أساسا ( بحسب الدراسات : الوقت اللي بتقعده في المستشفي لو هتشتغل فيه في قهوة هتاخد فلوس أكتر من اللي انت بتقبضه بكتير ) .. و عشان كدة بلاش تبوظ الخير اللي بتعمله بالزعيق و الخناق مع العيان...خصوصا في الظروف الحالية اللي ممكن العيان يخطفك تعالجه في بيتهم..
أهم حاجة في تعاملك مع المريض هو احتفاظك بشيئين....
أول حاجة أعصابك.....خصوصا مع الغباء الدائم اللي هتقابله و ده بيفكرني بموقف حقيقي لما قلت لواحد في الاستقبال كان جايب أمه العيانة ( لازم تروح تعمل سونار ) و بعد نص ساعة وجدت الست لوحدها..فسألتها فين ابنك يا حاجة قالتلي ( ماهو راح يعمل السومار اللي انت قلتله عليه يابني )
تاني حاجة رقم تليفونك...متيدهوش لأي عيان خصوصا انك هتفضل فاتحه علي طول لأن في أي وقت ممكن حد من البهوات المدرسين يكلمك...و ده بيفكرني ببعض المواقف الحقيقية عندما اتصل بي أحد المرضي في الثانية صباحا قائلا ( يا دكتور..يا دكتور... الحمدلله أنا عديت ريح...ممكن أشرب بق ميه ) و الموقف الأخر عندما تتصل بك احدي المراهقات في الثالثة صباحا و ترد و انت نايم أصلا
-ألو
-مين معايا؟
-أنا ريهام يا دكتور انت مش مسجل رقمي لسا؟
-ريهام مين؟
-أنا ريهام اللي عملت الزايدة عندكو من اسبوعين
-خير؟
-أصل أنا عندي صداع شديد و كنت عاوزة أسألك يا دكتور..ينفع أخد دوا صداع؟؟
-عادي يا ستي عادي...مع السلامة
-طب يا دكتور انت موجود بكرة؟؟ أصلي عاوزة أعدي أشكرك بنفسي...أصلك ذوق و محترم أوي يا دكتور..

12-
لازم تمشي بمبدأ ( ليه اعمل الحاجة لما ممكن معملهاش ؟ ) ...لكن لو اتقالك لازم تعملها...اعملها حلو عشان محدش ييجي يعملها معاك....

13-
استقيل و اشتغل طبال ورا رقاصة.....و بالنسبة للبنت.....احم.......اشتغلي في موبينيل.....





Michael Nessim

مقالات أخري علي

جنون المقالات الساخرة