ماعندك خدامة.؟؟ شوفي كيف تنظمين وقتك

طبعا قبل كل شي اكثري التسبيح والتحميد والتكبير ولا اله الا الله بكثره
بيعينج وااااااااااااااايد والاستغفار


الغلا اول ما تصلين الفير وتوعين ريلج يداوم واذا متعوده تسوين له شاي و كوفي او يتريق عى حسب نظامكم عقب مايروح خذي كيس زباله عوود وخذي كل الاوصاخ اللي بالبيت يعني من كل الحجر والحمامات وبنفس الوقت كل حجره دخلتيها رتبي المخد او كل شي بمكانه حطيه وحطي كيس زباله يديده وخلي بيدج رش لديتول اللي بالليمون او نكهه ثانيه عشان تشوفي اذا زبايل الحمام يبالها غسيل او شي وتنشفيهم وتلبسينهم كيس
وعقب اربطي الزباله وحطيها بالمطبخ وسيري حطي دفعة غسيل ودفعه بالنشافه او تنشرينهم وعقب غسلي لصحون او اي شي تغسلينه وعقب اي شي بالثلاجه من اكل بايت له كم يوم خلاص مابتاكلونه او له فتره ارميه او شي منتهي


بالنسبه لبنتج وعيها حتى لو نامت متاخر ماعليه بتكون تعبانه بس عشان تعلمينها على النظام وريقيها وخلصي امورها من بامبرز وكل شي وتنظيف وعطيها كم لعبه وعقب اربطي شعرج وشمري عن ساعديج ومسحي واكنسي البيت ومسحي اذا شي رخام وطبعا في خلقه على كتفج عشان لغبار للي على لطاولات وعقب توجهي للحمامات طبعا بنتج كل ما تتحركين بمكان خذيه وياج او افتحي لها رسوم او اذا صغيره وايد اشتري لمنز الكبير اللي يشبه السله ويحطون اليهال فيه ويكون شوي عود وحطي بداخله الالعاب وكل ما تخلصين تنظيف مكان تيرينها وياج


بالنسبه للحمامات حطي ورا كل مغسله ليفه للمغسله ووللبانيو ووحده ورا السيفون للاثنين اللي عدال بعض يوميا تنظيف سريع المغسله والبانيو رشي جف السريع وديتول اللي ريحته ليمون ونظفي بالليفه وعقب غسليها وردديها مكانها ونفس الشي بالنسبه للسيفون ورشي ديتول العادي على الارض وشي ماي وافركي بالموب واشطفي الماي بسرعه وعطريه بالمعطر


وحددي يوم معين يكون تنظيف عميق يعني غسيل للحمامات وللبيت كله
واذا ماتحبين تغسلين كل يوم حددي يوم غسيل ويوم كوي عشان تفتكين
وعقب تستعدين لطبخ الغدا بالنسبه لي قبل بيوم اشوف الطبخه اللي بسويها واجهز اغراضها يعني تقطيع بصل على ثوم على عصر طماط وكله بالثلاجه وتغطينه ولعيش اغسله الصبح واخليه بماي وبالثلاجه وغطيه لاني احب انام الصبح شوي هالشي يسهل عليج لانج بتطبخين بسرعه يعني جهزي الادوت والاغراض قبل بالليل من بهار واكياس مكرونه طلعيه يعني بس تيين تطبخين

تخلصين الغدا من وقت وتسبحي وتعدلي ويوم ايي ريلج يا انكم تتغدون ويا بعض او تغديين بنتج قبل لا يوصل ريلج وتخلصي امورها واذا هي تقاوم خليها تلعب وشوفي العصريه شو عندج ودخني لبيت وجهزي فواله وكيك تاكلين بنوتج وجيه يعني شغله خفيفه


واذا بعدها بنتج مانامت لين المغرب خلاص لا تخليها تنام حتى لو تعبانه خليها تلتهي بالالعاب وتعشوا تسع او تسع وشي وخلصي امورها وجيه بيترتب نومها واذا هي ماتقاوم وتحب تغفي بنص اليوم خليها تغفي بدري يعني يا الظهر او لعصريه عشان تغفي ساعه وتنش على لمغرب بس عقب لمغرب لا تخليها ولا بتتعبج وبالليل خلج ويا ريلج


هالشغل ليومي
الويكند استانسي بيوم للاهل ويوم طلعه على حساب ترتيبكم يعني رتبي هالشي واذا ماظهرتو اخترعي شي في البيت لعبي بنتج شي يديد استانسي ويا ريلج يعني اللي تبونه في وايد اقسام هني بتفيددج


ورتبي جدول اسبوعي وشهري وسنوي
اسبوعي يومين تختارينهم يوم تنظيف من الخاطر للبيت وتغسلين كل الملابس
ويوم تكوين


ويوم بالاسبوع تهتمين فيه بعمرج مب لازم صالون يعني تقشير في البيت على كريمات تناسبج على مغربي بيتي عى استرخاء وهني بتحصلين وايد اقسام بتفيدج بالعنايه
الشهري اربع مرات تغيرين الشراشف بالشهر او اكثر على حسب اذا توصخ شي ولا شي
تسوين جرد للبيت من اي شي تبين تفرينه زباله اوراق سامان متكسره
وطلعين ملابس او اي شي مناسب للتبرع تبين تتبرعين فيهم جواتي مب متقطعه يعني يصير تتبرعين فيهم واالمتقطع تفرينه من ومن

اطلعين شي يباله تصليح من سامان البيت عشان تودونه
تكتبين لستة للاغراض اللي تبينهم من الجمعيه او اي شي تحتاجينه
سنوي ترومين الغلا على حسب ميزانيتكم للبيت تغيرين شي من ديكور البيت مثل(صباغ_ تشترين جهاز كبير رياضي ولا للمطبخ _تغيير اثاث_ثريات )يعني تغيير جذري لبعض الامور على حسب اللي تبونه
وان شاءالله افدتج بشي والله يسعدج



المصدر:
[ندعوك للتسجيل في المنتدى أو التعريف بنفسك لمعاينة هذا الرابط]

لـ حفظ الموضوع والإستفاده منه إستخدمى هذا الرابط :
[ندعوك للتسجيل في المنتدى أو التعريف بنفسك لمعاينة هذا الرابط]
[ندعوك للتسجيل في المنتدى أو التعريف بنفسك لمعاينة هذا الرابط]