** ازاي أصنع من ابني انسان ناجح قادر على تحقيق أحلامه ؟ **

ازيكم حبيبات قلبي أخواتي عاملين ايه يارب ديم علينا الصحبة الطيبة ونكون دايما نافعين لبعض معينين بعض على تربية أولادنا متجمعين على فتكات حبيبتنا


موضوعي النهاردة أزعم انه هام جدا ان شاء الله وهيفيد كل الأمهات والزوجات

أنا هتكلم على أحلامنا اللي كنا بنحلم نحققها في حياتنا كل واحدة فينا بلا شك كان ومازال عندها أحلام كتيير حققتها ولسة عايزة تحققها


في مننا اللي كان نفسها تلتحق بكلية معينة ومحصلش نصيب بسبب المجموع طبعا ومكتب التنسيق " زي حالاتي [ندعوك للتسجيل في المنتدى أو التعريف بنفسك لمعاينة هذا الرابط] " وفي اللي كان نفسها تعيش في شقة فخمة ولا فيلا وتعيش في مكان راقي اوي وظروف أهلها كانت ماتسمحش بكدة واللي كان نفسها تحقق انجاز معين في أي مجال من مجالات الحياة ( رسم - شعر - صحافة - سياحة ) أي حاجة وبرده الظروف كانت أقوى منها أو محدش وجهها التوجيه الصحيح ، طيب ليه ماتحققيش أحلامك دي في أولادك " بما يتناسب طبعا مع ميولهم ومواهبهم وإرادتهم الشخصية " وحتى اللي الحمد لله حققت كل اللي بتحلم بيه أكيد نفسها برده ولادها يحققوا أحلامهم



[ندعوك للتسجيل في المنتدى أو التعريف بنفسك لمعاينة هذا الرابط]

في حاجات أساسية لازم تعلميها لإبنك وهي:


[ندعوك للتسجيل في المنتدى أو التعريف بنفسك لمعاينة هذا الرابط]
( 1 ) ازرعي في ابنك " الثقة بالنفس "

الثقة بالنفس هي أساس ومفتاح النجاح وطريق ابنك كي يحقق أحلامه ، وإليك بعض الخطوات اللي تقدري بيها تقوي ثقة ابنك بنفسه ( معلش هي نقط كتيير بس الثقة بالنفس دي أهم حاجة على الإطلاق ممكن يُكسبها الآباء لأبنائهم )


1- إظهار الحب عن طريق النظرات الحانية مع لمعة في عنيكي لا تتغير والأحضان والقبلات من غير سبب وابتسمي دايما


2- اظبطي ابنك وهو بيعمل حاجات كويسة مش العكس ، الأفعال السيئة طنشيها بعض الأوقات وحاولي تعدلي السلوك دة بطريقة غير مباشرة


3- اسمعي طفلك بكل حواسك وماتقاطعيهوش عشان تعرفي احساسه اللي ورا كلامه وتفهميه صح


4- علمي ابنك لما يتعصب ازاي يتخلص من العصبية بطريقة ايجابية ويعبر عن اللي مضايقه بدل ما انت كمان تتعصبي عليه


5- خلي طفلك يحكيلك أحلامه


6- ما تنهيش يومك بخلاف مع ابنك وأول حاجة يلقاها منك الصبح " الحب "


7- اتأكدي ان بكاء طفلك لجذب انتباهك أو لسبب وجيه وانهم ممكن يحسوا بالإحباط والأسى " زينا بالظبط "


8- شجعي طفلك على تكرار المحاولة لو أخطأ في شيء ما


9- ماتضايقيش ابنك بكتر ملاحظاتك وانتقاداتك


10- لو ابنك بيخاف من الضلمة سيبي نور الغرفة مضاء وماتجبريهوش يعمل حاجة بيخاف منها


11- ماتقارنيش ابنك بأطفال آخريين


12- ساعدي ابنك في اختيار قدوة لتعظيم القيم الروحية عنده


13- اسمحي لإبنك انه يحمل أخوه الرضيع وسيبيه يشارك في شراء مستلزماته واتناقشي معاه في وضع خطة للتعامل مع المولود الجديد


14- شاركي ابنك الضحك والبكاء


15- علقي رسومات ابنك وأعماله واهتمي بيها


16- احترمي قراره لو قال لأ في حاجات تخصه مش هتضره حتى لو مش على مزاجك


17- إذا نجح ابنك في عمل شيء شجعيه وافرحي بيه ولو عمل شيء رائع وغير متوقع كافئيه


18- علمي ابنك إن كل الناس بيغلطوا عشان لو غلط مايحبطش


19- حفزي ابنك دايما بعبارات تشجيعية ( أعرف انك تستطيع فعل ذلك )


20- اعتذري لإبنك لما تغلطي


21- اسمحي لإبنك انه يعمل معاكي بعض الأعمال " في المطبخ مثلا " ( تزيين كيك - غسل بعض الفواكه والخضروات )


22- حاولي تنمي مواهب طفلك مهما كانت هذه المواهب


23- اقرأي كتابات ابنك واهتمي بكل تفاصيلها


24- رحبي بإبنك دايما ترحيب دافيء عند عودته من المدرسة

[ندعوك للتسجيل في المنتدى أو التعريف بنفسك لمعاينة هذا الرابط]



( 2 ) علمي ابنك تحمل المسؤولية


و مفتاحها عدم التفريط في تدليل أطفالنا ولازم نوازن بين الخوف عليهم وتركهم يحاولوا بنفسهم


يعني انت لما بتجيبي لإبنك عجلة بتعلميه ازاي يركبها وبعدين تسيبيه يحاول ويقع على الأرض ويقوم ويحاول تاني لحد مايتعلم مش هتروحي تركبي العجلة مكانه عشان مايقعش وإلا عمره ماهيتعلم


والمثال دة بتمشي عليه في باقي المسؤوليات اللي عايزة ابنك يتعلمها

1- علمي ابنك يلبس لوحده أو ياكل لوحده الأول توريه ازاي الطريقة الصحيحة وبعدين تسيبيه يجرب بنفسه ، في البداية هياخد وقت كبير وممكن يقولك مش عارف " بعد مايحاول " قوليله انك فرحانة لإنه حاول وساعديه وقوليله بكرة ان شاء الله حاول تاني وهتعرف.


2- كوني انت وزوجك مثل أعلى لطفلك لإنه بيراقب أعمالكم وبيتعلم منها ولو فشلتي في عمل ما قوليله عشان يعرف ان الحياة نجاح وفشل


3- لما ابنك يتعرض لمشكلة علميه يحلها بنفسه اتناقشي معاه واسأليه هتتعامل مع المشكلة دي ازاي؟؟ بدل ما تجري انت تحليهاله


4- سيبي ابنك يجرب شعور الفشل عشان يعرف يتعامل معاه


5- حددي روتين يومي " موعد للمذاكرة - موعد للنوم " وسيبيه يدبر أموره وينجز مهامه قبل الموعد المحدد


6- علميه الاستقلالية عنك وحسيسيه انك واثقة من قراراته وامكانياته.

[ندعوك للتسجيل في المنتدى أو التعريف بنفسك لمعاينة هذا الرابط]


( 3 ) اجعلي لإبنك هدف في حياته عن طريق:

1- دايما ابعتيله رسايل ايجابية عن نفسه ( انت رائع - مبدع - متميز - مؤدب )


2- كلميه عن الانجازات اللي ممكن يحققها في المستقبل في مجالات كتيير يعني " يحقق ايه في علاقته مع ربنا بعد شهر مثلاً - يحقق ايه في زيادة قوته الجسمانية وصحته عن طريق الأكل الصحي - يحقق ايه في دراسته نتيجة نهاية العام " وهكذا


3- اربطي الانجازات دي بغايات كبرى ( ارضاء الله - الصحة - السعادة - النجاح )


4- نمي المشاعر الإيجابية تجاه انجازاته وعرفيه ازاي يسميها ( سعادتي برضا ربي - افتخاري بتفوقي الدراسي )


5- خلي عندك دايما توقعات ايجابية لإبنك وخلي توقعاتك مرتفعة دون الزام الطفل بأشياء أكثر من طاقته ( التوقعات تبني معتقدات لدى الطفل بقدرته على تحقيقها )

[ندعوك للتسجيل في المنتدى أو التعريف بنفسك لمعاينة هذا الرابط]



أنا خلصت حبيباتي ، ان شاء الله لو عملتي كدة هتحققي كل أحلامك اللي حققتيها أو ماحققتيهاش مع أولادك وهيكونوا أفضل وأنجح ناس في الدنيا ربنا يخليلنا أولادنا جميعا ويفرح قلبنا بيهم


لو شايفين الموضوع مهم قيموا عشان الكل يستفيد " ودي أول مرة أطلب منكم انكم تقيموا بس عشان احساسي بأهمية الموضوع


في أمان الله بحبكم في الله

[ندعوك للتسجيل في المنتدى أو التعريف بنفسك لمعاينة هذا الرابط]